#MeToo પર રાજ ઠાકરેએ કહ્યુ, 'મને ખબર છે નાના પાટેકર 'અસભ્ય' માણસ છે, પરંતુ...'

News18 Gujarati
Updated: October 18, 2018, 12:11 PM IST
#MeToo પર રાજ ઠાકરેએ કહ્યુ, 'મને ખબર છે નાના પાટેકર 'અસભ્ય' માણસ છે, પરંતુ...'
રાજ ઠાકરે, નાના પાટેકર (ફાઇલ તસવીર)

#MeTooને ખૂબ જ ગંભીર મુદ્દો ગણાવતા રાજ ઠાકરેએ કહ્યું હતું કે, આ મુદ્દે સોશિયલ મીડિયામાં ડિબેટ કરવી જોઈએ નહીં.

  • Share this:
મુંબઈઃ મહારાષ્ટ્ર નવ નિર્માણ સેનાના પ્રમુખ રાજ ઠાકરેએ બુધવારે નાના પાટેકરને 'અસભ્ય' માણસ કહ્યા હતા. જોકે, સાથે તેમણે એવું પણ કહ્યું હતું કે તેઓ માને છે કે તે નિર્દોષ છે. અભિનેત્રી તનુશ્રી દત્તાએ નાના પાટેકર પર જાતિય સતામણીના આક્ષેપો લગાવ્યા બાદ આ મામલે એક પછી એક લોકો નિવેદનો આપી રહ્યા છે.

"હું નાના પાટેકરને ઓળખું છું. તે નિર્દોષ છે. તેઓ ઘણું ગાંડપણ કરી ચુક્યા છે પરંતુ હું નથી માનતો કે તેઓ આવું કંઈ કરી શકે. આ બાબતે કોર્ટ યોગ્ય લાગશે તે કરશે. મીડિયાએ આ અંગે શું કરવું જોઈએ? #MeToo ખરેખરે ગંભીર મુદ્દો છે. તેના પર ટ્વિટર પર ચર્ચા કે આક્ષેપ-પ્રત્યાક્ષેપ કરવા અયોગ્ય છે." અમરાવતી ખાતે યોજાયેલા એક કાર્યક્રમ દરમિયાન મનસે પ્રમુખ રાજ ઠાકરેએ આ વાત કરી હતી.

#MeTooને ખૂબ જ ગંભીર મુદ્દો ગણાવતા રાજ ઠાકરેએ કહ્યું હતું કે, આ મુદ્દે સોશિયલ મીડિયામાં ડિબેટ કરવી જોઈએ નહીં. સાથે જ તેમણે એવી પણ આશંકા વ્યક્ત કરી હતી કે, પેટ્રોલ-ડીઝલના સતત વધી રહેલા ભાવ, ડોલર સામે સતત નબળો પડી રહેલો રૂપિયો અને દેશમાં બેરોજગારોની વધી રહેલી ફોજના સમાચારોને દબાવવા માટે પણ આ ચળવળને હવા આપવામાં આવી રહી હોઈ શકે છે.

આ પ્રસંગે રાજ ઠાકરેએ એવી પણ જાહેરાત કરી હતી કે, મહિલા સાથે કોઈ અનિચ્છનિય થાય છે તો તેઓ મનસેનો સંપર્ક કરી શકે છે. અમે આરોપીઓને સબક શીખવશું. મહિલાઓએ જ્યારે તેમની સાથે કંઈ અણછાજતું વર્તન થાય ત્યારે તાત્કાલિક અવાજ ઉઠાવવો જોઈએ, 10 વર્ષ પછી નહીં.

બોલિવૂડ અભિનેત્રી તનુશ્રી દત્તાએ 2008ના વર્ષમાં એક ફિલ્મના શૂટિંગ દરમિયાન નાના પાટેકર તરફથી જાતિય સતાણી કરવામાં આવી હોવાનો આક્ષેપ લગાવ્યા બાદ અનેક અભિનેત્રીઓ સામે આવી છે. અભિનેત્રીઓએ ફિલ્મ દિગ્દર્શકો, નિર્માતાઓ અને અભિનેતાઓ સામે યૌન શોષણના આક્ષેપ કર્યા છે.

#MeTooના નામ હેઠળ શરૂ થયેલી આ ચળવળમાં ફક્ત ફિલ્મ જગતની મહિલાઓ જ નહીં પરંતુ રાજકારણ, પત્રકારત્વ વગેરે ક્ષેત્ર સાથે જોડાયેલી મહિલાઓએ પણ પોતાનો અવાજ ઉઠાવ્યો છે.
First published: October 18, 2018, 12:11 PM IST
વધુ વાંચો
अगली ख़बर

તાજેતરના સમાચાર

corona virus btn
corona virus btn
Loading