અમિતાભ બચ્ચનના બંગલા 'પ્રતીક્ષા'નો અમુક ભાગ તૂટશે, આ છે કારણ

ન્યૂઝ18 ગુજરાતી: બોલિવૂડના મહાનાયક અમિતાભ બચ્ચનની મુશ્કેલી વધી છે. મુંબઇ મહાનગર પાલિકા (બીએમસી)એ અમિતાભ બચ્ચનના બંગલા 'પ્રતીક્ષા'ની કમ્પાઉન્ડ વોલ તોડવા માટે નોટિસ આપી છે. આની સાથે જ એ પણ કહેવામાં આવ્યું છે કે, જો અમિતાભ બચ્ચન કમ્પાઉન્ડ નહીં તોડે તો બીએમસી આને તોડી પાડશે.

મળતી માહિતી પ્રમાણે, જુહૂના સંત જ્ઞાનેશ્વર માર્ગ પર બિગ બીનો પ્રતીક્ષા બંગલો છે. આ બંગલા પાસેનો રોડ અત્યારે 45 ફૂટ પહોળો છે. રોડની પહોળાઇ ઓછી હોવાને લીધે ત્યાં ટ્રાફિક જામની સ્થિતિ જોવા મળે છે. લગભગ એકાદ વર્ષ પહેલાં આ રોડને પહોંળો કરવાની વાત કરાઇ હતી અને આને 60 ફૂટ કરવાનું નક્કી કરાયું હતું. કહેવાય છે કે, બીએમસીએ ઉદ્યોગપતિ કેવી સત્યમૂર્તિના બંગલાની દિવાલ બે દિવસ પહેલાં જ તોડી હતી. આ કાર્યવાહીથી નારાજ સત્યમૂર્તિએ કહ્યું હતું કે, બીએમસીના અધિકારી અમિતાભ બચ્ચનથી ડરે છે.

આ પણ વાંચો: 20 કિલો વજન ઘટાડવાનો છે આમિર ખાન, જાણો શું છે કારણ

કહેવાય છે કે, એક વર્ષ પહેલાં બીએમસીની નોટિસ મળતાં સત્યમૂર્તિએ આ અંગે હાઇકોર્ટમાં અરજી કરી હતી. જે બાદ રોડ પહોળું કરવાની કામગીરી રોકાઇ ગઇ હતી. પરંતુ હાલમાં જ હાઇકોર્ટે સત્યમૂર્તિની અરજી પર મુલતવી આદેશ આપવાનું ઇનકાર કરી દીધું છે. જે બાદ માર્ગ પહોળું કરવાની કામગીરી ઝડપી બનાવાઇ છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Bungalow, અમિતાભ બચ્ચન, બીએમસી, મુંબઇ