Home /News /dharm-bhakti /Exclusive Interview: પાકિસ્તાનમાં પણ ધામધૂમથી નવરાત્રિ ઉજવાય છે, જાણો કરાચીના ગુજરાતી યુવક સાથે થયેલી એક્સક્લૂઝિવ વાતચીત

Exclusive Interview: પાકિસ્તાનમાં પણ ધામધૂમથી નવરાત્રિ ઉજવાય છે, જાણો કરાચીના ગુજરાતી યુવક સાથે થયેલી એક્સક્લૂઝિવ વાતચીત

પાકિસ્તાનના કરાચીમાં રહેતા ગુજરાતી યુવક યોગેશ પટેલે નવરાત્રિની ઉજવણીને લઈને News18 Gujarati સાથે એક્સક્લૂઝિવ વાતચીત કરી હતી.

Exclusive Interview: દુનિયાભરમાં ગુજરાતીઓ ગમે ત્યાં વસતા હોય પણ સંસ્કૃતિને સાચવે છે. તેવી જ રીતે પાકિસ્તાનમાં રહેતા ગુજરાતીઓ પણ ધામધૂમથી નવરાત્રિ ઉજવે છે. આ અંગે કરાચીમાં રહેતા એક ગુજરાતી યુવાને News18 Gujarati સાથે એક્સક્લૂઝિવ વાતચીત કરી હતી અને ત્યાં ઉજવાતી નવરાત્રિ વિશે રસપ્રદ માહિતી જણાવી હતી.

વધુ જુઓ ...
અમદાવાદઃ આખા ભારતમાં ‘નવરાત્રિ’ ધામધૂમથી ઉજવવામાં આવે છે. ખાસ કરીને, ગુજરાતમાં નવરાત્રિનો ક્રેઝ ખૂબ જ જોવા મળે છે. તમને ખબર છે કે ભારતમાં જેટલી ધામધૂમથી નવરાત્રિ ઉજવવામાં આવે છે તેટલાં જ ધામધૂમથી પાકિસ્તાનમાં પણ નવરાત્રિની ઉજવણી કરવામાં આવે છે. જી હા, આ વિશે News18 Gujaratiએ પાકિસ્તાનના કરાચીના ગાર્ડન ઇસ્ટ વિસ્તારમાં રહેતા યોગેશ પટેલ સાથે ખાસ વાતચીત કરી હતી.

ગુજરાતી જ્યાં-જ્યાં વસ્યાં ત્યાં સંસ્કૃતિ સાચવી


પાકિસ્તાનમાં માત્ર કરાચી જ નહીં સમગ્ર સિંધ પ્રાંતમાં નવરાત્રિની ઉજવણી કરવામાં આવે છે. ગુજરાતીઓ જ્યાં જ્યાં રહ્યા છે, ત્યાં તેમણે સંસ્કૃતિ સાચવી છે. તેવી જ રીતે, એક સમયે અખંડ ભારતનો ભાગ ગણાતા હાલના પાકિસ્તાનમાં પણ મોટી સંખ્યામાં ગુજરાતીઓ વસે છે. પાકિસ્તાનના કરાચીમાં રહેતા યોગેશ પટેલે News18 Gujaratiને પાકિસ્તાનમાં ઉજવાતી નવરાત્રિને લઈને રસપ્રદ માહિતી આપી હતી. તો આવો તેમના શબ્દોમાં જ જાણીએ...

પાકિસ્તાનમાં ‘નવરાત્રિ’માં કેવો માહોલ હોય છે?


યોગેશ પટેલઃ અહીં આખા પાકિસ્તાનમાં નવરાત્રિ નથી ઉજવાતી, પણ જ્યાં ગુજરાતીઓ રહે છે, ત્યાં નવરાત્રિની ઉજવણી કરવામાં આવે છે. પાકિસ્તાનમાં મોટાભાગના ગુજરાતીઓ અહીં કરાચી અને તેની આસપાસ રહે છે. આ પ્રાંતને ‘સિંધ’ તરીકે ઓળખવામાં આવે છે. અહીં કરાચીમાં ઘણી બધી જગ્યાએ નવરાત્રિની ધામધૂમથી ઉજવણી કરવામાં આવે છે. અમે હિંદુ હોવા છતાં ક્યારેય માઇનોરિટીમાં હોઈએ તેવું નથી અનુભવ્યું. અહીં ગુજરાતીઓ જ નહીં, મુસ્લિમો પણ નવરાત્રિમાં તેટલા જ ઉત્સાહથી ભાગ લે છે. હું અત્યારે જે બિલ્ડિંગમાં રહુ છું, તે આખી મુસ્લિમની વસતીવાળી છે. માત્ર બે જ હિંદુના ઘર છે. છતાં હું એક ફોન કરીને કહું કે, ‘આવતીકાલે રાતે નવરાત્રિની ઉજવણી રાખી છે’ તો બધા જ આવે. મારા મોટાભાગના મિત્રો મુસ્લિમ છે. તેમના સહિત તેઓના પરિવારના લોકો પણ નવરાત્રિની ઉજવણી કરવા આવે.

yogesh patel karachi pakistan graphics 1
પાકિસ્તાનમાં ઘણી જગ્યાએ ધામધૂમથી મોટાપાયે નવરાત્રિનું આયોજન કરવામાં આવે છે.

કરાચીમાં ક્યાં ક્યાં નવરાત્રિ ઉજવાય છે?


યોગેશ પટેલઃ આમ તો, અહીંયા ઘણી બધી જગ્યાએ નવરાત્રિનું આયોજન કરવામાં આવે છે. અહીં લાઇટહાઉસ નામનો એક વિસ્તાર છે. ત્યાં શ્રી સ્વામિનારાયણ મંદિર આવેલું છે. ત્યાં નવરાત્રિનું આયોજન મોટાપાયે આયોજન કરવામાં આવે છે. ત્યારબાદ સોલ્જર બજારમાં શ્રી પંચમુખી હનુમાનજી મંદિર આવેલું છે. ત્યાં પણ નવરાત્રિની ઉજવણી થાય છે. પછી ક્લિફ્ટનમાં રત્નેશ્વર મહાદેવનું પૌરાણિક શિવ મંદિર છે. ત્યાં નવરાત્રિની સાથે સાથે ભંડારાનું પણ આયોજન કરવામાં આવે છે. એટલું જ નહીં, ઘણાં બિનહિંદુ વિસ્તારમાં પણ નવરાત્રિનું આયોજન કરવામાં આવે છે. મોટા મોટા ફૂટબોલ ગ્રાઉન્ડ્સમાં પણ આયોજકો નવરાત્રિનું આયોજન કરતા હોય છે.

આ પણ વાંચોઃ શક્તિપીઠ એટલે શું? કેવી રીતે બની શક્તિપીઠ અને તેની તમામ માહિતી

પાકિસ્તાનમાં સૌથી જૂની નવરાત્રિ કઈ જગ્યાએ ઉજવાય છે?


યોગેશ પટેલઃ અહીં કરાચીમાં જ સૌથી જૂની નવરાત્રિ ઉજવાય છે. રણછોડ લાઇન કરીને એક વિસ્તાર છે. આ વિસ્તારમાં ઘણાં વર્ષોથી માત્ર ગુજરાતીઓ જ રહે છે. હવે થોડા બિનહિંદુ લોકોનો પગપેસારો થયો છે. પણ હજુ મોટાભાગના લોકો તો ગુજરાતી જ છે. ત્યાં જઈએ તો એવું જ લાગે કે ‘મિનિ ગુજરાત’ છે. આ વિસ્તારમાં નવરાત્રિની ધામધૂમથી ઉજવણી કરવામાં આવે છે અને ખૂબ મોટાપાયે આયોજન કરવામાં આવે છે. અહીં લગભગ દરેક માતાજીના મંદિર પણ આવેલા છે. શેરીએ-શેરીએ, ચોકે-ચોકે અહીં દાંડીયા-રાસ રમાતા હોય છે.

YOgesh patel karachi pakistan interview graphic 2
યોગેશ પટેલે કહ્યુ હતુ કે, સિંધ સરકાર હિંદુ તહેવારો ઉજવવામાં ખૂબ સપોર્ટ કરે છે.

નવરાત્રિ ઉજવવામાં કોઈ તકલીફ પડે છે?


યોગેશ પટેલઃ ના, બિલકુલ તકલીફ નથી પડતી. અહીં દરેક હિંદુ તહેવારમાં સરકારનો ખૂબ સપોર્ટ હોય છે. મુસ્લિમો પણ ખૂબ સપોર્ટ કરે છે. અહીં નવરાત્રિમાં સ્પેશિયલ પોલિસ પ્રોટેક્શન આપવામાં આવે છે. ખાસ કરીને, જેટલાં પણ હિંદુ વિસ્તારો છે તે દરેક વિસ્તારમાં ચુસ્ત પોલીસ બંદોબસ્ત ગોઠવવામાં આવે છે. મહિલા રેન્જર્સ પણ તહેનાત હોય છે. બહેન-દીકરીઓને પણ કોઈ તકલીફ ના પડે તેનું પણ ખાસ ધ્યાન રાખવામાં આવે છે. રહી વાત સરકારની તો, સિંધ ગવર્નમેન્ટ દરેક તહેવારમાં હિંદુઓને ખૂબ મદદ કરે છે.

આ પણ વાંચોઃ અંબાજીમાં સતી માતાનું ‘હૃદય’ તો ભૈરવ પર્વત પર ‘હોઠ’ પડ્યો, ઘરે બેઠાં કરો દર્શન

હજુ એક આડવાત કરવા માગીશ કે, અહીં કોઈપણ પ્રકારની રોકટોક નથી. હિંદુઓ અહીં બહુ ખુશીથી જીવે છે. હિંદુ-મુસ્લિમ વચ્ચે પણ ખૂબ ભાઈચારો જોવા મળે છે. અહીં કોઈપણ ધાર્મિક કાર્યક્રમ હોય તો મુસ્લિમ કોમ્યુનિટી પણ સપોર્ટ કરે છે. નવરાત્રિની જ વાત કરું તો, તમને ખબર છે કે, નવરાત્રિમાં લાઇટિંગ અને સાઉન્ડ સિસ્ટમ ખૂબ જરૂરી છે. તો એ અહીં મુસ્લિમો જ ગોઠવી આપે છે. તે લોકો કહે છે કે તમતમારે વાપરો અમારે એકપણ રૂપિયો નથી જોતો. અરે, માતાજીનો પ્રસાદ હોય કે કોઈ ભંડારો હોય તો પણ સામેથી અઢળક દાન આપે છે અને સેવાના કામમાં પણ જોડાય છે.

નવરાત્રિમાં ત્યાં માતાજીની પૂજાવિધિની કોઈ ખાસ પરંપરાગત રીત ખરી?


યોગેશ પટેલઃ હા, અમે અહીં પરંપરાગત રીતે જ નવરાત્રિ ઉજવીએ છીએ. પહેલા નોરતે માતાજીનો ગરબો બેસાડીએ છીએ. ત્યારપછી જવારા વાવીએ છીએ. નવદિવસ તેની પૂજા અર્ચના કરવામાં આવે છે. ગરબા રમવામાં આવે છે અને પછી દસમે દિવસે તેને પધરાવી દેવાય છે. અહીં દરિયાકિનારે એક નેટિવ જેટ્ટી નામનો વિસ્તાર આવેલો છે. મોટાભાગના ગુજરાતીઓ ત્યાં જવારા પધરાવવા જતા હોય છે.

આ પણ વાંચોઃ નવરાત્રિમાં આ સોસયાટી 100 દિકરીઓને લેશે દત્તક

આશરે કેટલા ગુજરાતી પરિવારો ત્યાં નવરાત્રિ ઉજવતા હશે?


યોગેશ પટેલઃ અહીં ઘણાં ગુજરાતી પરિવારો રહે છે. અંદાજે કહું તો, એક હજારથી પંદરસો લોકો તો ખાલી સ્વામિનારાયણ મંદિરે જ ગરબા રમવા આવતા હોય છે. આ સિવાય અન્ય જગ્યાઓએ પણ ગરબાનું આયોજન થાય છે. એટલે ખૂબ મોટા પ્રમાણમાં ગુજરાતીઓ ગરબા રમતા હોય છે. ગુજરાતીઓ જ નહીં, મુસ્લિમ કોમ્યુનિટી પણ ગરબા રમે છે. બધા સાથે મળીને આ તહેવાર ઉજવે છે.

એક આડ પ્રશ્ન, તમે ગરબા રમો છો?


યોગેશ પટેલઃ હું ગરબા નથી રમતો પણ દાંડીયા રમું છું. મારી પત્નીએ મને દાંડીયા રમતા શીખવાડ્યા છે. બાકી મને ગરબા રમવાનો એટલો ખાસ શોખ નથી.

ત્યાં કયા-કયા તહેવાર ઉજવવામાં આવે છે?


યોગેશ પટેલઃ અહીં મોટાભાગના બધા જ હિંદુ તહેવારો ઉજવાય છે. ગણેશચતુર્થી, દિવાળી, રક્ષાબંધન બધું જ ધામધૂમથી ઉજવાય છે. તમે નહીં માનો, મારે કોઈ બહેન નથી તો મને રક્ષાબંધનમાં મુસ્લિમ મિત્રો રાખડી બાંધવા આવે છે. સાચું કહું તો અહીં હિંદુ-મુસ્લિમ જેવું કંઈ છે જ નહીં. અમે તેમના તહેવારોમાં ભાગ લઈએ છીએ અને તેઓ આપણાં તહેવારોમાં ભાગ લે છે. ઘણીવાર તો મુસ્લિમના તહેવારમાં મિત્રો મને સ્પેશિયલ આમંત્રણ આપીને બોલાવે છે. કોકવાર તે બધાને હું મારા ઘરે પણ જમવા બોલાવતો હોઉં છું. એટલે અહીં બહુ ભાઈચારાથી બધા તહેવાર ઉજવવામાં આવે છે.
Published by:Vivek Chudasma
First published:

Tags: Exclusive interview, Navratri 2022, Navratri celebration

विज्ञापन

ન્યૂઝ 18 ગુજરાતી ટ્રેન્ડિંગ

વધુ વાંચો
विज्ञापन
विज्ञापन
विज्ञापन