ખાંડ 'કડવી' લાગશે કદાચ! ઓછા ઉત્પાદનને કારણે સપ્લાય ધીમી, મિલો ટૂંક સમયમાં બંધ થશે

Sugar Prize: આગામી સમયમાં દેશમાં ખાંડના ભાવ વધી શકે છે. તેનું કારણ એ છે કે દેશના મુખ્ય ખાંડ ઉત્પાદક રાજ્ય મહારાષ્ટ્રમાં ખાંડના ઉત્પાદનમાં ઘટાડો થવાની સંભાવના છે. દેશના કુલ ખાંડ ઉત્પાદનમાં મહારાષ્ટ્રનો ફાળો એક તૃતીયાંશ કરતાં વધુ છે. આ વખતે વરસાદને કારણે શેરડીના પાકને થયેલા નુકસાનને કારણે મહારાષ્ટ્રમાં સુગર મિલો નિર્ધારિત સમય કરતાં બે મહિના પહેલા બંધ થઈ શકે છે. આ કારણે મહારાષ્ટ્રમાં ગયા વર્ષની સરખામણીમાં આ વર્ષે 7 ટકા ઓછું ખાંડનું ઉત્પાદન થઈ શકે છે.

સીઝનની શરૂઆતમાં, મહારાષ્ટ્રમાં ખાંડનું ઉત્પાદન 138 લાખ ટનથી વધુ થવાનો અંદાજ હતો. પરંતુ વાસ્તવિક ઉત્પાદન ઘટીને 129-130 લાખ ટન થઈ શકે છે. મહારાષ્ટ્રમાં ગયા વર્ષે જેટલા જ વિસ્તારમાં શેરડીનું વાવેતર થયું હતું. મરાઠવાડા પ્રદેશમાં શેરડીની પ્રતિ એકર ઉત્પાદકતામાં લગભગ 20 ટકાનો ઘટાડો થયો છે. વરસાદના કારણે પાક નિષ્ફળ જવાને કારણે આવું બન્યું છે. ચાલુ સિઝનમાં મહારાષ્ટ્રમાં ખાંડનું ઉત્પાદન ઘટવાથી દેશની ખાંડની નિકાસ પર પણ અસર પડી શકે છે.

આ પણ વાંચો:હોમ લોનના હપ્તાથી કંટાળી ગયા છો? લોન ભરપાઈ માટેના આ ઉપાયો અપાશે ચિંતાથી છૂટકારો

ખાંડનું અંદાજિત ઉત્પાદન 129 લાખ ટન

મનીકંટ્રોલના અહેવાલ મુજબ, મહારાષ્ટ્રના સુગર કમિશનર શેખર ગાયકવાડે આ સિઝનમાં રાજ્યમાં ઉત્પાદિત ખાંડ અંગે ચર્ચા કરવા માટે સુગર મિલના સંચાલકો સાથે બેઠક યોજી હતી. ગાયકવાડે જણાવ્યું હતું કે ઇથેનોલ ઉત્પાદન માટે વધુ શેરડીનો ઉપયોગ કરી શકાય છે. ખાંડનું ઉત્પાદન 138 લાખ ટનથી વધુ થવાનો અંદાજ હતો, જે હવે ઘટીને 129-130 લાખ ટન થઈ શકે છે. ગાયકવાડે કહ્યું કે વધુ પડતા વરસાદને કારણે શેરડીના છોડની ઊંચાઈ ઓછી થઈ છે. જેના કારણે આ વર્ષે પિલાણ માટે ઓછી શેરડી ઉપલબ્ધ છે. મહારાષ્ટ્ર ગયા વર્ષની સરખામણીમાં 45 થી 60 દિવસ વહેલા શેરડીનું પિલાણ બંધ કરવાની તૈયારી કરી રહ્યું છે.

વર્ષ 2021-22માં ખાંડનું રેકોર્ડ ઉત્પાદન

ગત વર્ષે ખાંડના ઉત્પાદનને લઈને મહારાષ્ટ્રમાં રેકોર્ડ બન્યો હતો. વર્ષ 2021-22ની સિઝનમાં પ્રથમ વખત 137 લાખ ટન ખાંડનું ઉત્પાદન થયું હતું. મહારાષ્ટ્રમાં ખાંડના બમ્પર ઉત્પાદનને કારણે ભારતે ગયા વર્ષે રેકોર્ડ 11.2 મિલિયન ટન ખાંડની નિકાસ કરી હતી. આ વર્ષે કેન્દ્ર સરકારે અત્યાર સુધીમાં માત્ર 60 લાખ ટન ખાંડની નિકાસ કરવાની મંજૂરી આપી છે. હવે કેન્દ્ર સરકાર નિકાસ અંગે નવેસરથી વિચારી રહી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Business news, Export, Sugar, Sugar Factory