નારી શક્તિ સામે ઝુક્યુ SBI, ગર્ભવતી મહિલાઓને અયોગ્ય ઠેરવતો આદેશ લીધો પરત

નવી દિલ્હી : દેશની સૌથી મોટી બેંક એસબીઆઈ (SBI) ને મહિલા શક્તિ અને અધિકારો સામે ઝુકવું પડ્યું છે. ભારે વિરોધ બાદ બેંકે ગર્ભવતી મહિલાઓને નોકરી માટે અયોગ્ય જાહેર કરતો આદેશ પાછો (SBI suspends circular)ખેંચી લીધો છે. ડિસેમ્બરમાં જાહેર કરાયેલા એક પરિપત્રમાં SBI એ 3 મહિનાથી વધુની સગર્ભા મહિલાને (pregnant women)નિમણૂક માટે અસ્થાયી રૂપે અયોગ્ય જાહેર કરી હતી. બેંકે કહ્યું હતું કે આવી મહિલા બાળકના જન્મના 4 મહિના પછી જ એપોઈન્ટમેન્ટ લઈ શકશે. ટ્રેડ યુનિયનો અને દિલ્હી મહિલા આયોગે તેની સામે કડક વલણ અપનાવ્યું હતું. ચારેબાજુ ટીકા બાદ બેંકે શનિવારે આ વિવાદાસ્પદ આદેશને જાણે કોલ્ડ સ્ટોરેજમાં મૂકી દીધો હતો.

SBIએ કહ્યું છે કે, ગર્ભવતી મહિલાઓની ભરતી અંગેના જૂના નિયમો જ અસરકારક રહેશે. આ નિયમોમાં ફેરફાર પાછળનો તેનો હેતુ ઘણા અસ્પષ્ટ મુદ્દાઓને સાફ કરવાનો હતો.

આ પણ વાંચો - Air india : ખૂબ રસપ્રદ છે એર ઇન્ડિયાના મહારાજાની કહાની, પાકિસ્તાનના વ્યક્તિથી પ્રેરીત છે તેમની મૂછો

મહિલા આયોગે જાહેર કરી હતી નોટિસ

દિલ્હી મહિલા આયોગના અધ્યક્ષ સ્વાતિ માલીવાલે એસબીઆઈના નવા નિયમોને મહિલાઓ સામે ભેદભાવપૂર્ણ ગણાવતા બેંકને નોટિસ પાઠવી હતી. તેમણે તેને માતૃત્વ અધિકારોનું ઉલ્લંઘન અને કાર્યસ્થળ પર વધતા ભેદભાવ તરીકે ગણાવ્યું હતું. સીપીઆઈ સાંસદ બિનોય વિશ્વમે પણ નાણામંત્રી નિર્મલા સીતારમણને પત્ર લખીને આ કાયદો પાછો ખેંચવાની અપીલ કરી હતી. આ સિવાય ઓલ ઈન્ડિયા એસબીઆઈ એમ્પ્લોઈઝ એસોસિયેશનના જનરલ સેક્રેટરી કેએસ કૃષ્ણાએ એસબીઆઈ મેનેજમેન્ટને પત્ર લખીને નિયમ રદ કરવા દબાણ કર્યું હતું.

મહિલા કર્મચારીઓના પ્રમોશન પર પડ્યો હોત પ્રભાવ

નવા નિયમની ટીકા કરતા ઓલ ઈન્ડિયા ડેમોક્રેટિક વિમેન્સ એસોસિએશન (AIDWA) એ કહ્યું કે તેનાથી મહિલા કર્મચારીઓના પ્રમોશન પર પણ અસર પડી શકે છે. નવી નિમણૂંકો લઈને આ નિયમ 21 ડિસેમ્બર, 2021 થી લાગુ કરવામાં આવ્યો હતો પરંતુ પ્રમોશનના કિસ્સામાં તે 1 એપ્રિલ, 2022 થી લાગુ થવાનો હતો. આવી સ્થિતિમાં અનેક મહિલા કર્મચારીઓના પ્રમોશન પર તેની અસર થવાની સંભાવના હતી.

આ પણ વાંચો - Good News: આનંદો! આ વર્ષે પગારમાં થઈ શકે છે બમ્પર વધારો, અભ્યાસમાં થયો ખુલાસો

મજૂર સંગઠનો અને દિલ્હીના મહિલા આયોગ સહિત સમાજના ઘણા વર્ગોએ આ જોગવાઈને મહિલા વિરોધી ગણાવીને રદ કરવાની માંગ કરી હતી. વિવાદ વધતાં SBIએ જનતાની લાગણીઓને ધ્યાનમાં રાખીને ગર્ભવતી મહિલા ઉમેદવારોની ભરતી અંગેની સુધારેલી માર્ગદર્શિકાને મુલતવી રાખવાનો નિર્ણય લીધો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Business, SBI bank