સોનાના ભાવમાં ઘરખમ ઘટાડો વધારી શકે છે તમારી ચમક, 16 મહિનામાં સૌથી સસ્તું

દિલ્હી: આર્થિક મંદીની ભીતી બાદ પણ સોનાના ભાવ (gold price)માં ઘટાડો થઇ રહ્યો છે. મંદી અને યુદ્ધ જેવી સ્થિતિમાં સોનાની કિંમતમાં વધારો જોવા મળતો હોય છે, પરંતુ આ વખતે સ્થિતિ કંઇક અલગ દેખાઇ રહી છે. અમેરિકામાં ટ્રેઝરી યીલ્ડ વધતાં અને ડોલર મજબૂત થતાં સોનામાં ઘટાડો જોવા મળી રહ્યો છે. જેના લીધે ગુરુવારે સોનાની વૈશ્વિક કિંમત ઘટીને (gold price fall) લગભગ એક વર્ષના નિચલા સ્તરે પહોંચી હતી.

આની અસર ઘરેલૂ માર્કેટમાં પણ જોવા મળી હતી. આજે સોનું ઘરેલૂ બજારમાં સતત બીજા દિવસે ઘટી 16 મહિનામાં સૌથી સસ્તું થયું છે. ગ્લોબલ માર્કેટમાં હાજર બજારમાં સોનાનો ભાવ આજે 0.5 ટકા ઘટી 1,687.29 ડોલર પ્રતિ ઓંસ પર આવી ગયો. આ ઓગસ્ટ 2021ની શરૂઆત બાદથી સોનાનું સૌથી નીચલું સ્તર છે. જ્યારે અમેરિકામાં ગોલ્ડ ફ્યુચરની કિંમત 0.6 ટકા ઘટીને 1,687.30 ડોલર પ્રતિ ઓંસ પર પહોંચી હતી.

સોનાની સાથે ચાંદીની ચમક પણ ફીક્કી પડી રહી છે. તેના ભાવમાં પણ ઘટાડો થઇ રહ્યો છે. ગ્લોબલ માર્કેટમાં સ્પોટ સિલ્વરના ભાવ 0.9 ટકા ઘટીને 18.49 ડોલર પ્રતિ ઓંસ પર પહોંચ્યો છે. પ્લેટિનમ પણ 0.7 ટકા સસ્તું થઇને 852.14 ડોલર પ્રતિ ઓંસ પર આવી ગયું છે. જોકે, પેલેડિયમમાં સામાન્ય તેજી જોવા મળી અને તેનો ભાવ 0.1 ટકા વધીને 1,863.47 ડોલર પ્રતિ ઓંસ પર પહોંચ્યો હતો.

કેમ સોનાના ભાવ ઘટી રહ્યા છે?

છેલ્લા ઘણા સમયથી સતત અમેરિકી ડોલરમાં તેજી જોવા મળી રહી છે. ડોલર 20 વર્ષની ટોચે પહોંચવાની નજીક છે. જ્યારે અમેરિકામાં ટ્રેઝરી યીલ્ડ 10 વર્ષમાં સૌથી વધુ છે. આના લીધે રોકાણકારો સમક્ષ સુરક્ષિત રોકાણના શ્રેષ્ઠ રિટર્નના ઉપાય ઉપલબ્ધ છે. સોના સહિતની કિંમતી ધાતુઓના ભાવમાં ઘટાડા પાછળનું સૌથી મોટું કારણ આ જ છે. ફેડરલ રિઝર્વના વ્યાજ દરમાં વધારો પણ તેમાં ભાગ ભજવી રહ્યા છે. તે આગામી સપ્તાહે યોજાનારી બેઠકમાં વ્યાજ દરમાં 0.75 ટકાના વધારાની જાહેરાત કરી શકે છે.

ઘરેલૂ માર્કેટની વાત કરીએ તો આઇબીજેએ અનુસાર, ગુરુવારે 24 કેરેટ સોનું 371 રૂપિયા ગગડી 50,182 રૂપિયા પ્રતિ 10 ગ્રામ રહ્યું. જ્યારે 23 કેરેટ સોનું 49,981 રૂપિયા પ્રતિ 10 ગ્રામ, 22 કેરેટ સોનું 45,967 રૂપિયા, 18 કેરેટ સોનું 37,637 રૂપિયા અને 14 કેરેટ સોનું 29,356 રૂપિયા પ્રતિ 10 ગ્રામ રહ્યું હતું. જે ભાવ વર્ષ 2021ની શરૂઆત બાદ સૌથી ઓછા છે. ધરેલૂ માર્કેટમાં ચાંદી 630 રૂપિયા ગગડી 54,737 રૂપિયા પ્રતિ કિલોગ્રામ પર પહોંચી હતી.

હાલમાં જ સરકારે સોનાની આયાત પર બેઝિક ઇમ્પોર્ટ ડ્યૂટી વધારીને 12.5 ટકા કરી હતી. આ પહેલા તેનો દર 7.5 ટકા હતો. ભારત સોનાનો બીજો સૌથી મોટો ગ્રાહક છે. ધરેલૂ માંગને પૂરી કરવા માટે ભારતને મોટાભાગે સોનાની આયાત કરવી પડે છે. કાચા તેલ બાદ સોનું ભારતના ઇમ્પોર્ટ બિલમાં સૌથી મોટા કમ્પોનેન્ટમાંથી એક છે. આગામી દિવસોમાં સોનાના ભાવમાં વધુ ઘટાડો જોવા મળે તેવું વિશ્લેષકો તારવી રહ્યા છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: 10 Gram Gold Price, Gold and Silver Price, Gold price