વિદેશ જવા ઈચ્છતા લોકોને ખૂટતા ડોક્યુમેન્ટ બનાવી આપવાના રેકેટનો પર્દાફાશ, દોઢ વર્ષમાં અનેક લોકો વિદેશ ગયા

અમદાવાદઃ વિદેશ જવા ઈચ્છતા લોકોને ખૂટતા ડોક્યુમેન્ટ બનાવી વિઝા અપાવવાના રેકેટનો અમદાવાદ ક્રાઈમ બ્રાન્ચે પર્દાફાશ કર્યો છે. જેમાં બે આરોપીઓની ધરપકડ કરી સંખ્યાબંધ બનાવટી દસ્તાવેજો કબજે કર્યા છે. મહત્વનું છે કે ઝડપાયેલા બે આરોપીમાંથી એક આરોપી વિરુદ્ધ અમેરિકામાં પણ ગુનો નોંધાયો છે અને ત્યાંની જેલમાં પણ તે એકાદ વર્ષ બંધ હતો.

અમદાવાદ ક્રાઈમ બ્રાન્ચની કસ્ટડીમાં રહેલા બે આરોપી ભાવિન પટેલ અને જસ્મીન અશોકભાઈ પટેલ છે. જે બંને ઘાટલોડિયા વિસ્તારના રહેવાસી છે. જેઓ સી.જી. રોડ પર આવેલા દેવપથ કોમ્પ્લેક્સમાં શાયોના હોલીડેના નામે ટૂર્સ એન્ડ ટ્રાવેલ્સનો વ્યવસાય કરે છે. પરંતુ તેની આડમાં બનાવટી દસ્તાવેજોના આધારે ખૂટતા ડોક્યુમેન્ટ પૂરા કરી વિઝા અપાવવાનું કામ કરતા હતા. વિદેશ જવા ઈચ્છતા લોકો આ બંને આરોપી ભાવિન પટેલ અને જસ્મિન પટેલ પાસેથી દસ્તાવેજો મેળવી વિઝા મેળવતા હોવાનું સામે આવ્યું છે.

આ પણ વાંચો: શું આજેઠા ગામે 25 શ્વાનોની સામુહિક હત્યા થઇ? ચોંકવાનારા વીડિયો અને ફોટો આવ્યા સામે

ભાવિન પટેલની સાયોના હોલીડેમાં રેડ કરી પોલીસે 39 પાસપોર્ટ, 55 સ્ટેમ્પ, જુદા-જુદા બેંકોના તથા કંપનીઓના સર્ટિફિકેટ, ત્રણ પેન ડ્રાઈવ, બે હાઇડ્રાઇડ અને બે કોમ્પ્યુટર કબજે કર્યા છે. જે તમામ દસ્તાવેજ સાચા છે કે ખોટા તેની ખરાઈ કરવાની કામગીરી શરૂ કરવામાં આવી છે. પ્રાથમિક તપાસમાં બેંકના ડોક્યુમેન્ટ ખોટા હોવાનું સામે આવ્યું છે. જેના આધારે ક્રાઈમ બ્રાન્ચે ગુનો નોંધી વધુ તપાસ હાથ ધરી છે.

મહત્ત્વનું છે કે પોલીસ તપાસમાં એ હકીકત સામે આવી કે, બનાવટી ડોક્યુમેન્ટ બનાવનાર રોનક સોની હજી ફરાર છે. જેની શોધખોળ હાથ ધરવામાં આવી છે. આ ઉપરાંત ઝડપાયેલ આરોપી ભાવિન પટેલની વિરુદ્ધમાં અમેરિકામાં પણ એક ગુનો નોંધાયો છે. જેમાં એક વર્ષ જેલમાં રહ્યો હોવાની પણ હકીકત સામે આવી છે. જેથી પોલીસે આ રેકેટમાં સંકળાયેલા તમામ આરોપીઓની ઉલટ તપાસ શરૂ કરી છે. ત્યારે પોલીસ તપાસમાં શું હકીકત સામે આવે છે તે જોવું મહત્વનું છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Ahmedabad crime branch, Ahmedabad Crime latest news, Canada visa fraud, US Visa