Ahmedabad: રસગુલ્લા ચા ની જુગલબંધીનો સ્વાદ માણવો હોય તો અહીં પહોંચી જજો! મજા પડી જાય એવી વસ્તુ છે

Parth Patel, Ahmedabad: દરેકની સ્વાદની ચોઇસ અલગ હોય અને કંઇકને કંઇક નવું જમવાની અવિરત ઇચ્છાના કારણે ભોજનની થાળીમાં આપણી સમક્ષ અવનવું આવતું જ રહે છે. ત્યારે ગુજરાતની ચા અને બંગાળના રસગુલ્લાની જુગલબંધી રૂપી એક વાનગીની વાત કરીએ કે જેણે અનેક લોકોનું ધ્યાન ખેંચ્યું છે. જી હા અમે વાત કરીએ છીએ રસગુલ્લા ચા ની.

ખાંડની ચાસણીમાં ઝબોળેલા, રૂ જેવા સ્પૉન્જી રસગુલ્લાને ચાસણીના બદલે કુલ્હડમાં ભરેલી ચા માં ડુબાડીને પીરસવામાં આવે છે. આ ચા ની વિશેષતા એ છે કે તે રસગુલ્લાની ચાસણીમાં પલાળેલા હોવા છતાં પણ મોઢું ભાગી નાખે તેવા મીઠા નથી હોતા. વળી ચા સાથેની જુગલબંધી કંઇક અલગ પ્રકારની જ ફિલીંગ આપે છે. તો ચાલો આજે આપણે વાત કરીશું અમદાવાદના મળતા રસગુલ્લા ચા ની.



આ આખો કોન્સેપ્ટ કોલકાતાથી ઇન્સ્પાયર્ડ છે

તુલીચેન્ટ્સ અવનવી ક્રિએટીવ એક્ટિવીટી કરાવતી સ્કૂલ તરીકે પ્રખ્યાત છે અને અહીં વિવિધ વયના બાળકો અને મોટાઓને નૃત્ય, યોગા, ગરબા, કીબોર્ડ, ગિટાર, ડ્રમ્સ, સંગીત વગેરે જેવા સાધનો અને સંગીત કળા પણ શીખવવામાં આવે છે. ત્યારે શહેરમાં ફૂડ, ફેશન અને લાઇફ સ્ટાઇલ બ્લોગિંગ સાથે સંકળાયેલા તુલી બેનર્જી એક નવા વિચાર સાથે અમદાવાદને એક નવા કોન્સેપ્ટની ઓળખ કરાવી છે.



જ્યાં બાળકો તેમજ પુખ્ત વયના લોકો તેમના મૂડને બદલવા, માનસિક તાજગી મેળવવા, તણાવના સ્તરને ઘટાડવા અને તેમના શોખને ટકાવી રાખીને તેમાં અપડેટ કરવાના હેતુથી બિઝનેસમેન અમજદ ખાનની સાથે મળીને તુલી-ચેન્ટ્સની શરૂઆત કરી છે. તાજેતરમાં જ ગયેલા ઇન્ટરનેશનલ ટી ડે ના દિવસે બંગાળની ફેમસ રસગુલ્લા ચા લોન્ચ કરવામાં આવી હતી.



અમદાવાદમાં ઓરિજિનલ બંગાળી વાનગીઓ મળવી મુશ્કેલ છે

તુલી બેનર્જી સાથે વાત કરતા જણાવ્યું કે ઘણાં સમયથી ફૂડ ઉદ્યોગ સાથે સંકળાયેલી હોવાથી અવનવા સંશોધન અને અવલોકન કર્યા બાદ મારા ધ્યાનમાં આવ્યું કે અમદાવાદમાં દુર્ગા પૂજાના સમયગાળા દરમિયાન લોકો બંગાળી વાનગીઓ માણતા હોય છે. આ સાથે અમદાવાદમાં ઓરિજિનલ બંગાળી વાનગીઓ મળવી મુશ્કેલ હોય છે.



બીજી વાત એ છે કે હું પોતે બંગાળી હોવાને કારણે પરંપરાંગત બંગાળી વાનગીઓની ઓળખ ધરાવું છું. આથી લોકોની માંગને ધ્યાનમાં રાખીને અમે એક્ટિવીટી સેન્ટરની બહાર ખુલ્લી જગ્યામાં બંગાળી નાસ્તાઓની યાદીમાં ઓથેન્ટીક રસગુલ્લાથી લઇ સોંદેશ, ઝાલ મુરી, સિંગ્હારા (એક જાતના સમોસા), લુચી (નરમ પુરી), બંગાળ સ્પેશ્યિલ પુચકા, મુગલાઈ પરાઠા, વેજ ચોપ જેવા અનેક નાસ્તા મળે છે.



આ સાથે બંગાળી શાકાહારી નાસ્તા સાથે 40 જાતની બંગાળી મીઠાઈઓ અને કોમ્બો મીલ્સ પીરસતું કાફે પણ છે. તેની સાથે અમે રસગુલ્લા ચા લોન્ચ કર્યા છે. અમદાવાદમાં આ રસગુલ્લા ચા શરૂ કરવા પાછળનો હેતુ એ છે કે મોટા ભાગે ગુજરાતી લોકો મીઠાઈના ભારે શોખીન છે અને દરેક ગુજરાતીને ચા પ્રત્યેનો અલગ પ્રેમ છે. તેથી અમે બંનેને ભેગું કરવાનું વિચાર્યું અને આંતરરાષ્ટ્રીય ચા દિવસ પર રસગુલ્લા ચા લોન્ચ કરી.

રસગુલ્લા ચા માં ગળપણ બેલેન્સ રાખવું એજ અમારી ખાસિયત છે

તુલીચેન્ટ્સના ભાગીદાર અમજદ ખાન બિઝનેસની સાથે સમાજસેવા અને રાજનિતી સાથે જોડાયેલા છે. આ બિઝનેસ વિશે વિશેષ માહિતી આપતા તેઓ જણાવે છે કે સંગીત અને નૃત્યનો શોખ જેમ શરીર અને આત્માને શુદ્ધ કરે છે. એમ અમારા કાફેમાં મળતી તમામ બંગાળી વાનગીઓ લોકોની કંઇક નવું અને શુધ્ધ બંગાળી ભોજન આરોગવાની ઇચ્છાને તૃપ્ત કરે છે.

રસગુલ્લા ચા માં ગળપણ બેલેન્સ રાખવું એજ અમારી ખાસિયત છે. આ ચા લોન્ચ કરવાથી લોકોને અમારી પ્રોડક્ટ તરફ આકર્ષણ વધ્યું છે. તેનો ટેસ્ટ કરવા લોકો દૂર દૂરથી આવે છે. મેં અહીંયા રસગુલ્લા ચા ની મોજ પહેલી વાર માણી હતી. મેં આવી કોઈ વાનગી ચાખી અને જોઈ પણ નથી.



જ્યારે ગરમ મસાલા અને એલાઇચી નાખેલી ઉકળતી ચા રસગુલ્લાવાળા કુલ્લડમાં કીટલી વડે રેડવામાં આવી ત્યારે મનમાં એમ જ થતું હતું કે આ એક્સપેરિમેન્ટનો સ્વાદ મારાં માટે કેવો સાબિત થશે. પણ આ ચા ખૂબ જ ભાવી. તેની કિંમત પણ માત્ર 50 રૂપિયા છે. તુલીચેન્ટ્સના તમામ શેફ બંગાળના હોવાના લીધે તેઓ આ ચા ની બનાવટ એકદમ યોગ્ય છે.

સરનામું: રસગુલ્લા ચા, તુલી સ્વીટ એન્ડ સ્નેક્સ, સીમા હોલની પાછળ, આનંદનગર, પ્રહલાદનગર રોડ, અમદાવાદ ખાતે આવી શકો છો.

શું તમે પણ સમાજને ઉપયોગી કામગીરી કરી રહ્યાં છો? શું તમે એવું કામ કર્યું છે જેનાથી સમાજને પ્રેરણા મળી શકે છે? તમારી સફળતાની સ્ટોરી અન્ય લોકોને જણાવવા ઈચ્છો છો? તો આજે જ p22.parth@gmail.com પર સંપર્ક કરો.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Ahmedabad news, Local 18, TEA, Tea shop