Gujarat Paper Leak: પેપર લીક કરનારા મુખ્ય આરોપી જીતને ગુજરાત લવાયો, થઈ શકે છે મોટા ખુલાસા

અમદાવાદઃ ગુજરાત પેપર લીક કેસ (Gujarat Paper Leak)માં ગુજરાત એન્ટી ટેરર સ્ક્વોડ (Gujarat ATS) દ્વારા સફળ કામગીરી કરવામાં આવી રહી છે. હૈદરાબાદથી પકડાયેલા મુખ્ય આરોપી જીત નાયકને વહેલી સવારે ગુજરાત લાવવામાં આવ્યો છે. વડોદરામાં ATS દ્વારા પેપર લઈને આવેલા શખ્સની ધરપકડ બાદ જીત નાયક સહિત 16ની ધરપકડ કરવામાં આવી છે. જેમાં 5 આરોપીઓ ગુજરાતના જ્યારે 11 આરોપીઓ ગુજરાત બહારના છે. ગુજરાત પંચાયત સેવા પસંદગી મંડળ (GPSSB Junior Clerk Exam) દ્વારા પેપર લીક થયાની માહિતી મળ્યા બાદ જુનિયર ક્લાર્કની પરીક્ષા રદ્દ કરવાનો નિર્ણય લેવામાં આવ્યો હતો. કુલ 1181 જગ્યાઓ માટે 9 લાખથી વધુ ઉમેદવારોએ આ પરીક્ષા માટે અરજી કરી છે.

પેપર લીક કરનાર મુખ્ય આરોપીને ગુજરાત લવાયો

ગુજરાત ATSની ટીમ પેપર હૈદરાબાદની કેએલ હાઈટેક પ્રિન્ટિંગ પ્રેસમાંથી પેપર લીક થયું હોવાની વિગતો અને આમાં ત્યાં કામ કરતા જીત નાયકની સંડોવણી હોવાની વિગતો મળતા તેની રવિવારે હૈદરાબાદથી ધરપકડ કરી લેવામાં આવી હતી. આરોપી જીત નાયકને સોમવારે વહેલી સવારે એટીએસની ટીમ ગુજરાત લઈને પહોંચી છે. હવે આરોપી જીતની પૂછપરછમાં વધુ કેટલાક મહત્વના ખુલાસા થવાની સંભાવના વ્યક્ત કરવામાં આવી રહી છે.

આ પણ વાંચોઃ સુરતઃ લૂઝ પેકિંગમાં iPhone લાવીને ખેલ પાડતા હતા, બે પકડાયા

હૈદરાબાદથી બિહાર થઈને પેપર ગુજરાત પહોંચાડાયું

જુનિયર ક્લાર્કના પેપર છપાયા તે હૈદરાબાદની પ્રિન્ટિંગ પ્રેસમાં લેબર તરીકે કામ કરતા જીતે પેપર લીક કરીને તે તેના સગા પ્રદીપ નાયકને આપ્યું હતું. આ પછી પ્રદીપે પેપર બિહારના મુરારી પાસવાનને પેપર આપ્યું હતું. મોરારી અને પીન્ટુ રાય નામનો શખ્સ ગુજરાતની પેપર ફોડ ટોળકીના સંપર્કમાં હતો. આ પછી પેપરને હૈદરાબાદમાં ફોડ્યા બાદ બિહાર થઈને ગુજરાતમાં લાવવામાં આવ્યું હતું.




નોંધનીય છે કે, 30મીએ 11 વાગ્યે ગુજરાત પંચાયત સેવા પસંદગી મંડળની જુનિયર ક્લાર્કની પરીક્ષા યોજાવાની હતી. જોકે, પરીક્ષા યોજાય તે પહેલા જ પેપર લઈને વડોદરામાં બેઠેલા ગઠીયાઓને ગુજરાત એટીએસની ટીમે દરોડા પાડીને પકડી પાડ્યા હતા. આ પછી આ પેપર ફોડની ઘટનાના તાર ગુજરાત બહાર જોડાયેલા હોવાની વિગતો મળી હતી. જેના આધારે તપાસ કરીને જીતને તેલંગાણામાંથી દબોચી લેવામાં આવ્યો હતો.

ન્યૂઝ 18ની ટીમ પહોંચી આરોપી કેતન બારોટના ઘરે
આરોપી કેતન બારોટની ક્રાઈમ કુંડળી !
પેપર લીક કેસમાં અગાઉ CBIએ દબોચ્યો હતો #Gujarat #Paperleak #juniorclerk pic.twitter.com/PGsbv0GLi3

— News18Gujarati (@News18Guj) January 30, 2023

5થી 15 લાખમાં પેપર વેચવાનો હતો પ્લાન

પેપર ફોડ્યા બાદ આરોપીઓ 15 દિવસથી તે લઈને ફરતા હતા પરંતુ તેમને કોઈ ખરીદનાર મળતું નહોતું, આ પછી છેલ્લી ઘડીએ તેઓ પેપર વેચવાની ફિરાકમાં હતા અને ઝડપાઈ ગયા હતા. ખરીદનારની શક્તિ જાણીને પેપર 5 લાખથી 15 લાખ સુધીની કિંમતે વેચવાનો પ્લાન બનાવવામાં આવ્યો હતો.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarat ATS, Gujarat police, Gujarati news, Paper leak, ગુજરાતી સમાચાર, પેપર લીક