ડ્રગ્સ મામલે કોંગ્રેસનો ભાજપ સરકાર પર પ્રહાર, કહ્યું - ડ્રગ્સ માફિયાઓને શરણ કોણ આપે છે? - Gujarat Congress attacked on bjp over drugs cases

Home /News /ahmedabad /ડ્રગ્સ મામલે કોંગ્રેસનો ભાજપ સરકાર પર પ્રહાર, કહ્યું - ડ્રગ્સ માફિયાઓને શરણ કોણ આપે છે?

ફાઇલ તસવીર

ગુજરાત રાજ્યમાં કથળતી કાયદો અને વ્યવસ્થા મુદે કોંગ્રેસે રાજ્ય સરકાર પ્રહાર કર્યા હતા. ત્યારે કોંગ્રેસનો આરોપ છે કે, ગયા વર્ષ કરતા 11 ગણું વધુ ડ્રગ્સ ગુજરાતમાં પકડાયું છે.

News18 Gujarati
Last Updated : March 12, 2023, 18:16 IST
Ahmadabad, India

પ્રણવ પટેલ

ગાંધીનગરઃ ગુજરાત રાજ્યમાં કથળતી કાયદો અને વ્યવસ્થા મુદે કોંગ્રેસે રાજ્ય સરકાર પ્રહાર કર્યા હતા. ત્યારે કોંગ્રેસનો આરોપ છે કે, ગયા વર્ષ કરતા 11 ગણું વધુ ડ્રગ્સ ગુજરાતમાં પકડાયું છે. ગુજરાત વિધાનસભા પ્રમાણે વર્ષ 2022ના બે વર્ષમાં 370 કરોડથી વધુ ડ્રગ્સ પકડાયું હતું. તેની સરખામણીમાં વિધાનસભા પ્રમાણે વર્ષ 2023ના બે વર્ષમાં વધીને 4058 કરોડથી વધુ રૂપિયાનું ડ્રગ્સ પકડાયું છે. છેલ્લે એક વર્ષમાં 3689 કરોડથી વધુ રૂપિયાનું ડ્રગ્સ પકડાયું છે. ડ્રગ્સ અને નશીલા પદાર્થના ગુનામાં સજા અપાવવાનો દર (કનવિકસન રેટ) 2.66%થી ઘટી 1% થયો છે અને ગુના બમણાં નોંધાયા છે.

ગુજરાત પ્રદેશ કોંગ્રેસ સમિતિના પ્રવકતા પાર્થિવરાજસિંહ કઠવાડિયાએ જણાવ્યુ હતુ કે, ‘ગુજરાત રાજ્યમાં કાયદો અને વ્યવસ્થા મોટા પ્રમાણ કથળી રહી છે. વર્ષ ૨૦૨૨માં વિધાનસભામાં આપેલા આંકડા કરતાં વર્ષ ૨૦૨૩માં ગુજરાત રાજ્યમાં ૧૧ ગણું વધુ ડ્રગ્સ પકડાયું છે. વર્ષ ૨૦૨૨માં વિધાનસભામાં છેલ્લા બે વર્ષમાં 370 કરોડ રૂપિયાથી વધુનું ડ્રગ્સ પકડાયું હતું. તેવી વિગત આપવામાં આવી હતી.

આ પણ વાંચોઃ લોકસાહિત્યકાર માયાભાઈ આહિરે દેવાયત ખવડના વખાણ કરતા કહ્યુ...

તેમણે વધુમાં જણાવ્યું હતું કે, ‘૧૧ માર્ચ ૨૦૨૩ના દિવસે વિધાનસભામાં સરકારે આપેલી વિગત પ્રમાણે, છેલ્લા બે વર્ષમાં 4058 કરોડ રૂપિયાનું ડ્રગ્સ પકડાયું છે. બંને વિગતોની સરખામણીમાં છેલ્લા એક વર્ષમાં 3687 રૂપિયાનું વધુ ડ્રગ્સ પકડાયું છે. ગુજરાત મોડેલની વાહવાહી લૂંટતા સરકાર અને ભાજપના આગેવાનો શું આ પ્રકારના મોડેલની વાત કરતા હતા. જ્યાં મોટા પ્રમાણમાં ડ્રગ્સનું દૂષણ વધી રહ્યું હોય? ઊડતા પંજાબની જેમ આવનારા સમયમાં ઊડતા ગુજરાત જેવા ચલચિત્રના બને તેવી ચિંતા થાય છે. ગુજરાત રાજ્યનું ભાવિ એવા યુવાનો તરુણો ડ્રગ્સના દોઝખમાં ભવિષ્ય બરબાદ ન કરે તેવી પણ એક નાગરિક તરીકે ચિંતા થાય છે. ગુજરાત રાજ્યમાં ડ્રગ્સના ગુનામાં ઓછો સજા દર સરકાર ની સંવેદનશીલતા ઉપર સવાલ ઊભો કરે છે.’

વધુમાં કઠવાડિયાએ જણાવ્યુ હતુ કે, ‘રાજ્યસભામાં પ્રસ્તુત આંકડા પ્રમાણે ૨૦૧૮માં 150 ગુના સામે 4 ગુનામાં સજા થઈ છે. ૨૦૧૯માં ૨૮૯ ગુના સામે ૩ ગુનામાં સજા થઈ અને ૨૦૨૦માં ૩૦૮ ગુના સામે ૪ ગુનામાં સજા થઈ છે. તે દર્શાવે છે કે ગુના નોંધાવાનો દર બમણો થયો છે અને સજા દર 2.5%થી ઘટી અને 1% થયો છે. નેશનલ ક્રાઇમ રેકોર્ડ બ્યુરોના આંકડા પ્રમાણે દેશમાં ડ્રગ્સ અને નાર્કોટિક્સના ગુનામાં સજા દર ૭૭.૯% છે. તેની સરખામણીમાં ગુજરાતમાં ખૂબ ઓછો છે. ગુજરાત રાજ્યમાં કથળતી કાયદો વ્યવસ્થા માટે ગૃહ મંત્રીએ નૈતિક જવાબદારી સ્વીકારી રાજીનામું આપવું જોઈએ. ગુજરાત રાજ્યમાં વધતા ડ્રગ્સના દૂષણને રોકવા માટે સરકારે કડક પગલાં લેવા જોઈએ. ગુજરાતમાં હજારો કરોડ ના ડ્રગ્સ સંબધિત ગુનાખોરી થઈ રહી છે. પણ સરકાર મોટા માથાને પકડવામાં સફળ થઈ ખરી? તે સવાલ સમગ્ર ગુજરાતની જનતામાં ઉછળી રહ્યો છે. ડ્રગ્સ માફિયાઓને કોણ શરણ આપી રહ્યું છે અને કોના ઇશારે આ ગુનાખોરીનો વધારો થઈ રહ્યો છે. તેમની ઉપર કડક કાર્યવાહી ની જરૂર છે.’

વર્ષ ૨૦૨૨ વિધાનસભા પ્રમાણે પકડાયેલા ડ્રગ્સની કિંમત 370 કરોડ રૂપિયા અને વર્ષ ૨૦૨૩માં વિધાનસભા પ્રમાણે પકડાયેલા ડ્રગ્સની કિંમત 4058 કરોડ રૂપિયા છે.