અમદાવાદ SOGની કાર્યવાહી, નકલી પોલીસ વેરિફિકેશન સર્ટિફિકેટ બનાવવાનો પર્દાફાશ; એક આરોપીની ધરપકડ

અમદાવાદઃ અત્યાર સુધી નકલી માર્કશીટ, નકલી ડિગ્રી જેવા બનાવટી દસ્તાવેજો પકડાયા હોવાના કિસ્સા સામે આવ્યા હતા. પરંતુ હવે કેટલાક ભેજાબાજ આરોપી નકલી પોલીસ વેરિફિકેશનના સર્ટિફિકેટ બનાવવાના શરૂઆત કરી દીધી છે. એસઓજીએ આવો જ એક સર્ટિફિકેટ બનાવવાનો પર્દાફાશ કર્યો છે અને આરોપીની ધરપકડ કરી છે.

અમદાવાદ SOGએ બેન્ક મેનેજર તરીકે રહી ચૂકેલા અને બારોબાર પોલીસના નામે બનાવટી વેરિફિકેશન સર્ટીફિકેટ તૈયાર કરનારા ભેજાબાજની ધરપકડ કરી છે. સામાન્ય રીતે કોલેજ સ્કૂલ કે અન્ય મહત્વપૂર્ણ માર્કશિટ કે ડિગ્રી, એફિડેવિટ કે મહત્વપૂર્ણ ડોક્યુમેન્ટના બનાવટી દસ્તાવેજો તૈયાર કરવાના કિસ્સા તો સામે આવતા હોય છે, પરંતુ હવે તો પોલીસના નામ સિક્કા અને સહી સાથેના સર્ટિફિકેટ બનવા લાગ્યા છે. આ કિસ્સામાં પોલીસે બાતમીના આધારે બેન્ક લોન રિકવરીનું કામકાજ કરતા સંદીપ પાંડેની આશ્રમ રોડ પર આવેલી એસ. આર સર્વિસિસના નામે ચાલતી ઓફિસમાં રેડ કરી હતી. જ્યાંથી તેની ઓફિસમાં કામ કરતાં 8 કર્મચારીઓના ખોટા પોલીસ વેરીફિકેશન મળી આવ્યા છે.

આ પણ વાંચોઃ રાજકોટની સિનર્જી હોસ્પિટલના મહિલા તબીબનો ગળેફાંસો ખાઈને આપઘાત

SOG ક્રાઈમે આરોપીની ધરપકડ કરીને પૂછપરછ શરૂ કરી છે. આરોપી સંદીપ પાંડે મૂળ બિહારનો રહેવાસી છે અને છેલ્લા 12 વર્ષથી અમદાવાદમાં રહે છે. આરોપી પાંચ વર્ષ પહેલાં અમદાવાદના ડ્રાઇવિંગ રોડ સ્થિત એચડીએફસી બેન્કમાં બ્રાન્ચ મેનેજર તરીકે પણ કામ કરી ચૂક્યો છે. ત્યારબાદ તેને ICICI, HDFC, Axis જેવી બેન્કોમાં લોન રિકવરિંગ માટે કામ શરૂ કર્યુ છે. તે માટે તેને 8 કર્મચારીઓને જોબ પર રાખ્યા હતા. પરંતુ બેન્ક માટે લોન રીકવરી કરવા કાયદા પ્રમાણે આ કામ માટે કર્મચારીઓના પોલીસ વેરીફીકેશન જરૂરી હોય છે, જેથી આરોપીએ નકલી સર્ટિફીકેટ તૈયાર કરી દીધા હતા.

આ પણ વાંચોઃ અયોધ્યામાં રામલલ્લા બિરાજમાન, હવે મથુરાનો વારોઃ બાગેશ્વર બાબા

એસઓજીએ ઓફિસમાં સર્ચ કરતા વી.જે વ્યાસ, પોલીસ ઇન્સ્પેકટર સ્પેશિયલ બ્રાન્ચના નામના સિક્કા પણ મળી આવ્યા છે. તેનો ઉપયોગ આરોપી નકલી પોલીસ વેરિફિકેશન સર્ટિફિકેટ કરતા હતા. અમદાવાદ SOGએ આરોપી સંદીપ પાંડેની ધરપકડ કર્યા બાદ તેના રિમાન્ડ મેળવીને વધુ પૂછપરછ કરશે. જેમાં આરોપીએ 8 કર્મચારી સિવાય શું અન્ય કર્મચારીઓના વેરિફિકેશન સર્ટિફિકેટ બનાવ્યા હતા કે કેમ? વેરીફિકેશન સર્ટિફિકેટ સિવાય અન્ય કોઈ બનાવટી દસ્તાવેજ બનાવ્યા હતા કે કેમ તે અંગે વધુ પૂછપરછ કરવામા આવી રહી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Ahmedabad crime news, Ahmedabad news, Ahmedabad police