અમદાવાદમાં રહીને અમેરિકનોને 'બાટલીમાં ઉતારતો', આમ આચરતો છેતરપિંડી

અમદાવાદ: અમેરિકન નાગરિકો સાથે છેતરપિંડી કરતા એક આરોપીની સાયબર ક્રાઇમે ધરપકડ કરી છે. આરોપી સ્પેક્ટ્રમ ટેલીકોમ કંપનીની ઓળખ આપી ઈન્ટરનેટ અને અનલિમિટેડ કોલ માત્ર 76 ડોલરમાં આપવાની ઓળખ આપી છેતરપિંડી કરતો હતો. સાયબર ક્રાઇમે ગુનો નોંધી આરોપીની ધરપકડ કરી છે, ત્યારે આરોપીની ધરપકડ બાદ શું નવા ખુલાસા થાય છે તે જોવું મહત્વનું છે.

અમદાવાદ સાયબર ક્રાઇમની કસ્ટડીમાં રહેલા આરોપીનું નામ દિલીપ રામ દયાલ ચૌધરી છે. જે મૂળ રાજસ્થાનનો વતની અને અમદાવાદમાં નવરંગપુરા વિસ્તારમાં વસવાટ કરે છે. આરોપી દિલીપ ટાઇટનિયમ હાઇટ્સમાં 114 નંબરની ઓફિસ ધરાવી કેપિટલ કેરના નામે બોગસ કોલ સેન્ટર ચલાવતો હતો. જેમાં અમેરિકન નાગરિકો સાથે છેતરપિંડી કરતો હતો. આરોપી કોઈપણ પ્રકારના ટેક્સ વિના માત્ર 76 ડોલરમાં ફાઇબર ઓપ્ટિકલ ઇન્ટરનેટ અને અનલિમિટેડ કોલ આપવાના બહાને છેતરપિંડી આચારતો હોવાનો ખુલાસો થયો છે. જે અંગે સાઇબર ક્રાઇમે ગુનો નોંધી આરોપી દિલીપ ચૌધરીની ધરપકડ કરી છે.

આ પણ વાંચો: અમદાવાદ: વહુનો આપઘાત છૂપાવવા સાસરિયાઓએ બનાવી કહાણી

સાયબર ક્રાઇમે આરોપી દિલીપ ચૌધરીની ઓફિસમાં રેડ કરી તેની પાસેથી એક લેપટોપ, એક કોમ્પ્યુટર, છ મોબાઇલ, એક મેજિક જેક ડિવાઇસ, બે હાર્ડ ડિસ્ક, પાંચ પીઓએસ મશીન, નવ સીમકાર્ડ કબ્જે કર્યા છે. સાથે-સાથે અલગ અલગ બેંકોની 12 ચેકબુક અને 31 જેટલા ક્રેડિટ અને ડેબિટ કાર્ડ કબ્જે કર્યા છે. સાથે જ આરોપીની પૂછપરછમાં ખુલાસો થયો કે, અમેરિકન નાગરિકો પાસેથી મેળવેલા રૂપિયા હવાલા તેમજ બીટકોઈન મારફતે મેળવતો હતો. જે અંગે સાઇબર ક્રાઇમે વધુ તપાસ હાથ ધરી છે.

આરોપી દિલીપની તપાસ કરતાં વર્ષ 2014માં નવરંગપુરા પોલીસે છેતરપિંડી અને કોલ સેન્ટરના ગુનામાં તેની ધરપકડ કરી હતી અને તે હિસ્ટ્રી સિટર હોવાનું પણ સામે આવ્યું છે. જેથી સાયબર ક્રાઇમે આરોપી કોની-કોની સાથે જોડાયેલો છે અને હવાલાના રૂપિયા મેળવવામાં કોની મદદ લેતો હતો. તે અંગે તપાસ તેજ કરી છે, ત્યારે પોલીસ તપાસમાં શું નવા ખુલાસા થાય છે તે જોવું મહત્વનું છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Ahmedabad news, Crime news, Gujarat News