અમદાવાદ: યુવકને અજાણી યુવતી સાથે મિત્રતા કરવી ભારે પડી, ફિલ્મી સ્ટોરીની જેમ થયું અપહરણ

અમદાવાદ: અમદાવાદમાં ફરી એક વાર હનીટ્રેપનો કિસ્સો સામે આવ્યો છે. જેમાં ટ્રેનમાં યુવતી સાથે યુવકની મિત્રતા થતા ફોન નંબરની આપલે થઈ હતી. કચ્છના યુવકે અમદાવાદ આવીને યુવતીને મળવા બોલાવતા યુવતી મળવા તો આવી પરંતુ અચાનક બે શખ્સોએ આવીને યુવક સાથે માર મારી તેના ભાઈનું અપહરણ કરી લઈ ગયા અને એક લાખ રૂપિયાની ખંડણી માગી હતી.

23 વર્ષીય યુવકે આ મામલે ફરિયાદ નોંધાવી

કચ્છના ગાંધીધામ ખાતે રહેતા 23 વર્ષીય યુવકે આ મામલે ફરિયાદ નોંધાવી છે. 6 મહિના પહેલા યુવક અમદાવાદના મેઘાણીનગરમાં કલાપીનગર ખાતે રહેતા નાના-નાનીને ત્યાં આવ્યો હતો અને બે દિવસ રોકાઈને ટ્રેન મારફતે ગાંધીધામ જવા નિકળ્યો હતો. કાલુપુર રેલવે સ્ટેશનથી તેની સાથે એક પરિવાર પણ ટ્રેનમાં ચઢયો હતો. તે પરિવાર સાથે વાતચીત થતા એક યુવતી સાથે તેની ઓળખાણ થઈ હતી. યુવતીએ પોતે રિવરફ્રન્ટ નજીક રહેતી હોવાનું જણાવી અમદાવાદ આવો તો ફોન કરવાનુ કહીને નંબરની આપ-લે કરી હતી.

આ પણ વાંચો: ઠક્કરનગરની સગીરા પર દુષ્કર્મ આચરી ત્રણ આરોપીએ લૂંટી, એકની અટકાયત

ફોન કરી બન્ને સિવિલ હોસ્પિટલ નજીક મળ્યા હતા

થોડા સમય બાદ યુવક અને યુવતી વચ્ચે અવારનવાર વાતચીત થતી હતી. 5 મહિના પહેલા ફરિયાદી અમદાવાદ આવ્યો હતો. ત્યારે તેણે યુવતીને ફોન કરતા બન્ને સિવિલ હોસ્પિટલ નજીક મળ્યા હતા. આ યુવકની સગાઈ રાજસ્થાનના ગંગાપુર ખાતે થઈ હોવાથી તે માતાપિતા અને પરિવાર સાથે ગંગાપુર ગયો હતો અને દિવાળી કરીને 29મી ઓક્ટોબરના રોજ નાના-નાનીના ઘરે મેધાણીનગર આવ્યો હતો. યુવકના માસી બુટભવાની ખાતે રહેતા હોવાથી ફરિયાદી નાનાભાઈ સાથે માસીને મુકવા બુટભવાની ગયો હતો.

યુવતીનો ફોન આવતા ફરિયાદી અમદાવાદ આવ્યો

ઉલ્લેખનીય છે કે, આ સમયગાળા દરમિયાન યુવકને યુવતીનો ફોન આવતા ફરિયાદીએ પોતે અમદાવાદ આવ્યો હોવાનુ જણાવતા બન્નેએ સાંજના સમયે પાલડી ચાર રસ્તા માટે મળવાનું નક્કી કર્યું હતું. સાંજના સાડા પાંચ વાગે ફરિયાદી પોતાના નાનાભાઈ અને માસીના દિકરા સાથે માસીની એક્ટીવા લઈને પાલડી ખાતે યુવતીને મળવા ગયો હતો. જ્યાં પાલડી AMTS બસ સ્ટેન્ડ પર યુવતી ઉભી હોવાથી ફરિયાદી પોતાના બન્ને ભાઈઓને દૂર ઉભારાખી પોતે યુવતીને મળવા ગયો હતો.

આ પણ વાંચો: 'તારી બહેનને કપડાને બધું ઘણું અપાવ્યું છે, પ્રેમ સંબંધ બાંધવાનો છે'

બે યુવકો ત્યાં આવીને ફરિયાદી સાથે બોલાચાલી

બન્ને વાતચીત કરી રહ્યા હતા તે જ સમયે અચાનક બે યુવકો ત્યાં આવીને ફરિયાદી સાથે બોલાચાલી કરી ઝઘડો કરવા લાગ્યા હતા..જેથી નજીક જ ઉભેલા તેના બે ભાઈઓ તેને છોડાવવા વચ્ચે પડ્યા હતા. જે સમયે યુવક ત્યાથી ભાગ્યો હતો અને પાછળ વળીને જોતા બન્ને શખ્સોએ તેના નાના ભાઈને એક્ટીવા પર બળજબરીથી બેસાડી લઈ જતા નજરે પડ્યા હતા.

‘એક લાખ રૂપિયા ગુગલ પે કરી દે’: અજાણ્યો યુવક

ફરિયાદ પ્રમાણે થોડા સમય બાદ યુવકને નાના ભાઈના નંબરથી ફોન આવ્યો હતો અને સામેથી અજાણ્યા યુવકે પોતે વિક્રમ બોલે છે તેમ કહીને યુવકને નાનાભાઈના નંબર પર એક લાખ રૂપિયા ગુગલ પે કરી દે નહીં તો તારા ભાઈના હાથપગ તોડી નાખીશ તેવી ધમકી આપી ફોન કાપી નાખ્યો હતો. જોકે તે સમયે ફરિયાદી યુવકના માસી ત્યાં આવી જતા આ મામલે પાલડી પોલીસને સંપર્ક કરી ફરિયાદ નોંધાઈ હતી. આ મામલે પાલડી પોલીસે ગુનો નોંધી તપાસ શરૂ કરી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Ahmedabad crime news, Honey trap, Honey Trap New