નીતિન ગોહેલ, ભાવનગર : આઈપીએલની હરાજીમાં (IPL 2021 Auction)સૌરાષ્ટ્રના ભાવનગરના વરતેજ ગામના ફાસ્ટ બોલર ચેતન સાકરિયાને (Chetan Sakaria)રાજસ્થાન રોયલ્સની ટીમે 1.2 કરોડમાં ખરીદ્યો છે. વરતેજ ગામના સાધારણ આર્થિક પરિસ્થિતિ ધરાવતા સાકરિયા પરિવારના ચેતનને બાળપણથી ક્રિકેટનો જબરો શોખ હતો, પરંતુ એક તબક્કે આર્થિક સંકડામણથી ક્રિકેટનું સપનું રોળાય જાય તેવા સંજોગો ઊભા થયા હતા, પરંતુ ચેતનના મામા મનસુખભાઇએ પાર્ટ ટાઇમ કામ આપ્યું અને ક્રિકેટ પણ ચાલુ રખાવ્યું હતું. બસ, અહીંથી ચેતને પાછું વળીને જોયું નથી અને આ વખતે IPL હરાજીમાં 1.2 કરોડમાં વેચાતા ચર્ચાનું કેન્દ્ર બન્યો છે. 22 વર્ષીય ફાસ્ટ બોલરે આ વખતે સૈયદ મુસ્તાક અલી ટ્રોફીમાં 4.90ના ઈકોનોમી રેટથી 12 વિકેટ ઝડપી હતી. ચેતન સાકરિયાએ તાજેતરમાં જ પોતાની ક્રિકેટ જર્ની વિશે વાત કરી હતી.