બ્રેગ્ઝિટ: બ્રિટનવાસીઓએ જનમત તો આપ્યો, પરંતુ હવે શું થશે?

Posted on: Jun 24, 2016 12:56 PM IST | Updated on: Jun 24, 2016 01:01 PM IST

છેવટે એ જ થયું, બ્રિટનનું બ્રેગ્ઝિટ થયું. બ્રેગ્ઝિટ એટલે 28 દેશોના યૂરોપીયન સંઘમાંથી બ્રિટનનું અલગ થવું તે. જનમતના પરિણામ આવી ગયા છે. યૂકે એટલે કે યૂનાઇટેડ કિંગડમના યૂરોપીય સંઘથી છૂટાછેડા થઇ ગયા છે. ચાર દાયકાના ગાઢ રિલેશનનું બ્રેકઅપ થયું છે. આઝાદીની રાહ પર નવા સપનાઓ સેવતા બ્રિટનવાસીઓ ઉજવણી મનાવી રહ્યા છે તો બીજી તરફ આ પરિણામને પગલે વૈશ્વિક બજારોમાં વિપરીત અસર જોવા મળી રહી છે. આ બ્રેકઅપની શું અસર થશે? હવે શું? સૌ માટે ચર્ચાનો વિષય છે.

ઓછામાં ઓછા 2 વર્ષ લાગશે

બ્રેગ્ઝિટ: બ્રિટનવાસીઓએ જનમત તો આપ્યો, પરંતુ હવે શું થશે?

આ બધુ તો થવાનું જ હતું. જનમતના પરિણામ ગમે તે હોત તો પણ શેરબજાર અને મુદ્રામાં હલચલ તો થવાની જ હતી. પરંતુ નોંધનિય બાબત એ છે કે, મહિનાઓના પ્રચાર બાદ આજે જનમતના પરિણામ જાહેર થયા છે એ તરત જ લાગુ કરી દેવાશે અને યૂકે યૂરોપીય સંઘથી અલગ થઇ જશે એવું નથી. 28 દેશોના આ મજબૂત સંઘમાંથી બહાર નીકળતાં યૂકેને ઓછામાં ઓછા બે વર્ષ જેટલો સમય નીકળી જશે.

અંદાજે 52 ટકા લોકો અલગ થવાની તરફેણમાં

અંદાજે 52 લોકો લોકો યૂરોપીય સંઘથી અલગ થવાના પક્ષમાં છે તો 48 ટકા લોકો સાથે રહેવાની તરફેણ કરી રહ્યા છે. બીજા વિશ્વ યુધ્ધ પછી યૂરોપના 28 દેશોની એકતાને આ સૌથી મોટો આંચકો છે.

અર્થતંત્ર, બજારમાં કડાકો

જનમતના પરિણામથી ભારતીય બજાર હચમચી ગયા છે અને રૂપિયો તૂટી ગયો છે. સેન્સેક્સ અને નિફ્ટી બંનેમાં ભારે ઘટાડો નોંધાયો છે. પરંતુ વિશેષજ્ઞોને આશા છે કે બજાર બંધ થતાં થતાં બજાર સુધરી જશે, પરંતુ અહીં સૌથી મોટો ઘટાડો પાઉન્ડમાં નોંધાયો એ છે. અંદાજે 12 ટકા નીચે આવ્યો છે. 2008ની વૈશ્વિક મંદીના દોરમાં પાઉન્ડની કિંમતમાં ઘટાડો આવો નોંધાયો હતો.

ભારત પડકાર માટે તૈયાર

ભારતીય અર્થવ્યવસ્થા પર પણ આની અસર પડી છે. જોકે નાણા સચિવનું કહેવું છે કે દેશ આ માટે તૈયાર છે. નાણામંત્રીનું પણ કહેવું છે કે, ભારતનું અર્થતંત્ર કોઇ પણ પ્રકારની હલચલનો સામનો કરવા માટે તૈયાર છે.

કાયદા નવેસરથી ઘડાશે

યૂનાઇટેડ કિંગડમ 1973થી યૂરોપીય સંઘનું સભ્ય છે. આ સંઘથી અલગ થતાં ઘણા બધા કાયદાઓમાં ફેરફાર કરવા પડશે. વીતેલા ઘણા દાયકામાં યૂરોપીય સંઘ અને યૂકે વચ્ચે જે પણ સમજૂતી થયેલી છે, જે કરારો થયેલા છે એ બધાને ફરીથી નવેસરથી લખવા પડશે બનાવવા પડશે.

27મીએ થશે સત્તાવાર જાહેરાત

આમ પણ જનમતના પરિણામોને કાયદાકીય બંધારણના રૂપમાં માનવા ઉતાવળ કહેવાશે. કારણ કે યૂરોપીય સંઘથી યૂકેના અલગ થવાની સત્તાવાર જાહેરાત તો યૂરોપીય પરિષદ 27 જૂને કરશે.

અનુચ્છેદ 50 આવશે અમલમાં

આ સત્તાવાર જાહેરાત બાદ 1973માં રોમમાં થયેલા સમજુતી કરારના અનુચ્છેદ 50ને અમલમાં લાવવામાં આવશે. આ અનુચ્છેદ અનુસાર બંને પક્ષોને અલગ થવામાં ઓછામાં ઓછા બે વર્ષનો સમય આપવાની જોગવાઇ છે. યૂકે તો યૂરોપીય સંઘ સાથે એટલું ઓતપ્રોત હતું કે એને તો અલગ થવામાં વધુ સમય લાગી શકે એમ છે.

નવી નીતિઓ બનાવતાં 2019

પ્રી-લીવ એટલે કે અલગ થવાની વકીલાત કરનારા બ્રિટનના સાંસદ લિયામ ફોક્સનું માનવું છે કે, નાગરિકતાથી લઇને વ્યાપાર સુધી અને અર્થ વ્યવસ્થાથી લઇને સુરક્ષા સુધી, તમામ નીતિઓને નવેસરથી બનાવવા માટે ઓછામાં ઓછો 2019 સુધીનો સમય લાગી શકે એમ છે.

અગાઉ ગ્રીનફિલ્ડ, ગ્રીસ થયા અલગ

હવે જોવાનું એ પણ જરૂરી છે કે, આ અગાઉ અન્ય કોઇ દેશ યૂરોપીય સંઘથી અલગ થયો હતો કે શું? 1985માં ડેન્માર્કના ગ્રીનફિલ્ડે સંઘ સાથે નાતો તોડ્યો હતો પરંતુ બાકીનું ડેન્માર્ક આજે પણ સંઘનો ભાગ છે. આ રીતે ગ્રીસે પણ ગંભીરતાથી આ વિચાર કર્યો હતો. પરંતુ એના શું પરિણામ આવ્યા એ જગજાહેર છે.

બ્રિટનના જવાથી શું સંઘ તૂટી જશે?

યૂકે પહેલો એવો સ્વાયત અને મજબૂત દેશ છે કે જેણે અલગ થવાનો આ રસ્તો પસંદ કર્યો છે. જેને નકશે કદમ પર ચાલીને અન્ય વધુ દેશો પણ બહાર આવવાનો વિચાર કરે તો નવાઇ નહીં, જો આવું થયું તો નેવુના દાયકામાં જે રીતે સોવિયત સંઘ તૂટ્યું હતું એ રીતે યૂરોપીય સંઘ ધીરે ધીરે તૂટી જશે. પરંતુ એક વાત ચોક્કસ છે કે યૂરોપીય સંઘના તૂટવાથી વૈશ્વિક સ્તરે મોટી અસરો પડશે, વિશ્વની અર્થ વ્યવસ્થા અને સ્થિરતા પર ગંભીર અસર પડી શકે એમ છે.

સંબંધિત સમાચાર

સુચવેલા સમાચાર